Komunidade Ida, Istoria Ida (Suku Lahane Osidental) - Isac Mascarenhas

Programa komunidade ida istória ida refere hakarak hatan ba objetivu hat. Primeiru, rekolla memória koletiva komunidade nian kona-ba eventu pasadu sira iha prosesu luta nian ne'ebé sira envolve ka implika ba sira-nia vida. Segundu, liuhusi hakerek no publika, programa ida-ne'e mós nu'udar aktu ida ba prezerva no transmite memória pasadu nian. Terseiru, programa ida-ne'e mós nu'udar aktu ida ba dignifika ema hotu nia kontribuisaun ba prosesu luta naruk ne'e. Kuatru, programa ida-ne'e mós hanesan aktu ida hodi hamosu balansu narrativa istória nasionál atu responde ba kestaun rua. Iha sorin ida halo balansu ba narrativa istória ne'ebé dominadu husi grupu eminente sira no iha sorin seluk hakloot divizionizmu ka ego-rejionalizmu kona-ba partisipasaun iha reziténsia ba ukun rasik-an ne'ebé sai tiha narrtiva dominante iha resente dékada katak iha parte balun de'it husi ema Timor-Leste nian mak partisipa no kontribui boot liu ba ukun rasik-an.